多地遺囑

 多地遺囑-

立遺囑，或平安紙時，需要考慮兩方面的事情：(1) 何人會係平安紙中的受益人，和 (2) 財產的性質及地理上的分布情況。第 (1) 點，以前已經講過，重點係邊個係受益人，以及邊個如果唔係受益人，係法律上，可否日後法律上提出訴訟，向遺產執行人追討。

第 (2) 點而言，一般人比較少注意。就不動產黎講，如果立遺囑人在香港，以及海外都有財產，如果生前只立左一份平安紙，唔理係香港立定係海外立。如係香港所立，日後係香港做遺產承辦，去處理香港的不動產，當然唔會有問題。問題就發生係點樣去處理海外的不動產了? 因為香港遺產承辦處的遺產認證，係唔可以攞去海外任何一個國家做所謂 resealing 。如加拿大就唔可以。

結果，後人就唔可以簡單直接係加拿大辦理所在地的不動產。後人需要係加拿大重新做一次遺產承辦。立遺囑人過身的永居地就變得好重要，因為，假如立遺囑人係香港過身，加拿大的遺產承辦需要用香港的承辦法律去處理。當中的律師費支出會大好多。呢個係所謂 conflict of laws 的問題。呢種情況下：客人最好係香港及加拿大分別立一份平安紙。日後，後人可以分別係香港同加拿大辦理遺產承辦。律師費支出會比較低。

如果，海外的不動產處於英國，後人可以用 resealing 的方法去處理承辦。如只得一份香港平安紙，後人可以係香港遺產承辦處攞左遺產認證之後，去英國做 resealing 。反過黎，只得一份英國平安紙，後人就要係英國做遺產認證之後，返香港做 resealing 。但較簡單的方法都係香港同英國分別立一份平安紙。日後，後人可以分別係香港同英國辦理承辦。律師費支出會比較低。

上述因不動產而引起的 conflict of laws 的問題，同樣會發生係如銀行存款上。如後人係加拿大攞住遺產承辦認證返香港的銀行要求提款，香港銀行唔會承認，亦唔會采你。