爭產案件

爭產 - 

先人不願看見，後人樂於進行的行為。大家一聽見爭產，一定會想起多年前城中的數百億争產案。其實，香港有好多身家幾千萬，到幾億的富豪，有更多的争產案其實係這種家產為背景的。争產的方式其實五花八門。多年前老爺同家嫂，之後家嫂同風水佬的案件，都係遺囑的案件。有的係公司法的案件。有啲係信託的案件。

一般而言，最少身家有幾百萬可能已經可以争下啦！若果，遺產中有物業，遺產的價值可能就不只五百萬了。如果律師費係五十萬，只係十分之一不用，好多人都會願意争下。所以争產的情況比大家想像的要多。

最常見的一種争法係，先人無立遺囑，或者，所立遺囑不理想，一些係法律上可從先人遺產中得到合理經濟濟助的人士，若因先人無立遺囑，或者，所立遺囑無佢份，都可在遺產承辦後半年內提起訴訟，告遺產。如果成功，除了可以攞到合理經濟濟助，重有機會攞返自己的律師費。當然，通常都會相方尋求和解。所以律師費不會好大。

有物人可以攞到合理經濟濟助呢？一般黎講，死者的同居女友，死者生前有不時及予金錢的。或者，係死者老婆，但遺囑無佢份（可能死者知佢不忠？）。上述兩種人士通常有機會申索到合理經濟濟助。但亦不只上述兩種人，具體情況，最好尋求法律意見。

如果先人在生時己成立信託，而信託人又在信託下有酌情權去處理信託財產，受益人有權去要求信託人按信託的條款去處理。有争詨，受益人可向信託人提起訴訟。亞梅老母單案就係今啦！因為信託人係代表信託去應訊，所用律師費會由信託中扣除。後果現在大家都知啦，好快財產就畀左律師啦！

公司法又如何呢？早十年，燒鵝記單嘢，大佬同二佬争身家，就係打公司法啦！老豆係做生意，希望死後一家人繼續經營落去，所以以某種比例將股份分畀後人，但點分將來都可能會出問題。大股東蝦細股東，公司法下，細股東可向大股東提起訴訟，所謂 unfair prejudice 。要求合理價賣出股份，或公司清盤。

筆者有幸，上述三種品種都處理過。心明訟費的問題。所以最好揾律師做下財產安排，避免主懷安息之時，就係後人争產之始。

刑事，出事？

刑事，出事？

碰上刑事，可謂出事。唔好以為自認好人，刑事就唔關你事。就最近而言，假若你係不適當的時間於不適當的地點出現，例如早段時間旺角的路人甲，畀差佬（即警察，或稱pc）隊，重話你襲警。就算你自認好人，一樣出事。以筆者所見，不少襲警的指控，都幾挍野。

所以市民必須了解自己的權利，先可以保護個人的人權。筆者不願在此扮講師，但必先講明背後的理念，道理先會自然流出。人權係與生俱來（即self evidenced）。由於個人單靠一己之力，係好難保護個人的人權，所以大家組織左政府，之後組織左警察，這種組織都對個人自由有一定的限制，但出發點係用警權去保人權。

搞清上述理念之後，大家就明白當前香港對人權最大的挑戰，就係警權。如果警隊要玩你，佢有幾萬人，要人有人，要物有物。加上律政的支源，你點同佢玩呀？這時可以幫到你的，只有你的律師同公正的法律系統。

先講律師點幫你。如果你畀差佬周左，有兩種可能會發生的情形：第一種，佢地已經夠料做你，返警局只係例行工事，去落charge。第二種，未夠料，上左警車已經chok你，攞料。返到警局，就落口供，希望chok夠料，落charge做你。筆者經驗所見，通常情況係後者。這時，你一定要明白你的個人權利。首先，被調查人士係無義務協助警方調查的（係呀！叫你唔好睇今多警訊啦！）。其次，你有權揾律師一齊落口供。律師到前，你有權唔落口供，同保持緘默。筆者幾年前處理過一件案件，只係一蕉保持緘默，警方就落唔到charge，最終close file。可算代表作啦！

法律系統又點幫你呢？英國法官，深明國家機器對個人權利的威脅。普通法就發展出在刑事審訊中，控方必須在無合理疑點之下，證明被告人犯左被指控的罪行，先可入罪。如果被告可以解釋並提出合理疑點，在疑點歸於被告的前題下，係入唔到罪的。這就可平衡警權的威脅。

警權威脅人權，就好似癌細胞威脅好細胞一樣。癌症一定係預防勝於治療。即保持緘默，無料就自然做唔到你。筆者未見過因為保持緘默而入到罪，但就見過好多講左嘢，落左口供，成為証據，反唔到口，罪名成立的例子。

律師信

律師信 - 客人好多時揾律師，就係出律師信。到底幾時要出律師信，而律師信的目的及功效又如何呢？一般嚟講，客人對某人有申索，而申索的法律基礎為：違約，侵權，租務，人身傷亡，等等。出律師信就係向對家提出你的要求，要佢係指定的時間內回覆要求。講得白啲，就係嚇下佢。

律師信的功效又如何呢？筆者的經驗真係一半一半。即一半時候可以成功嚇到對家，另一半時候嚇唔到。成功時，對家會按照你的要求去做。但另一半時間會否浪費律師費呢？又唔一定。因為，差不多所有的官司都由律師信開始的。入稟告人前，通常要先向對方出律師信，否則日後就算贏左官司都可能攞唔返自己的律師費。因為對家可以講入稟係不必要的，如果你一早出信，佢就按你的要求做啦！

當然，出左律師信後，嚇唔到對方，都唔代表你一定要入稟去告對方的。入稟與否，主要考慮兩方面：第一、你的法律理據有幾强，即俗語所謂有無 case ；第二、對家的可能反應係點？

就上述第一點而言，如果你無物理據，打起官司，好大機會會輸，就唔好輕言入稟。打官司好比打擂臺，你叫得對手上擂臺，唔係話唔打就唔打。要相方同意和解先可終止案件。如對方已耗用了一筆律師費，唔係你話唔打就唔打。對方通常會要求你支付佢的律師費作為和解的其中一個條件。

話分兩頭講。有理據又唔一定要入稟去告人，因為要考慮費用同申索額是否對稱。另一方面，有時無物理據又唔代表唔入稟。這時就要考慮上述第二點了。例如，客人好清楚對家係省錢類型，一定唔會請律師，這時贏面會大好多。或者，對家闊佬懶理，客人就可以係被告人唔應訊的情況下登入判決。

筆者的經驗中，上述情況時有發生，由其申索額八萬、十萬到十多萬的。因為對方揾律師的費用都要十幾萬，計唔掂數。或者，係揾左律師，做左啲嘢，不過收到律師的第一張收費單，要畀幾萬蚊，即時停左佢，轉做個人自辯。

總而言之，不能一概而言。要看個別情況先可決定入稟與否。但係律師信就可以出左先，因為費用有限，效用可能好大。好多人從來無收過律師信，真係會畀你嚇親。

醫療失誤

醫療失誤事件時有發生，往往令人不快。因為醫療失誤事件發生的後果，好多時會導致病人健康受損，甚致死亡。處理醫療失誤案件時，筆者往往需要同時辦演法律上及心理上的角色。當然，最終能幫助到客人，滿足感還是很大的。

一般而言，醫療失誤事件可分為兩類︰可成功申索的，同不能成功申索的。理由係，要成功申索，原告人必須證明︰第一、有關的醫生有違反責任，第二、有關的違反責任導致原告人有損失，以及第三、相關的損失必須是實質性的。上述三點任何一點如原告人不能證明，申索都不可能成功。

問題係病人點先知道有可成功申索的醫療失誤事件？筆者遇醫療失誤事件的客人時，第一時間會向客人解釋，首先要有醫學專家的報告，證明相關的醫生有無違反責任。由於醫學領域非常專門，法官同律師必須依賴醫學專家的報告，才能判定醫生有無違反責任，即上述第一點。上述第二及第三點為法律問題，由法官判決。

由於香港的醫學界長久存在醫醫相衞的情況，筆者為客人揾適合的醫學專家去撰寫專家報告時，通常不會選擇本地的醫學專家。英國的醫學專家通常更專業同操守更佳。很奇怪，英國的醫學專家收費一般要比本地的平宜。筆者現時正處理一件醫療失誤的案件，有關的英國專家看完了有關的醫學記錄之後，在無須撰寫專家報告下，己有專家意見，認為相關的香港醫生無違反責任，通知不用撰寫專家報告下，幫客人省下了一筆費用。本地專家發生這種情況機 會不大。

醫療失誤案件最大的功能係為申張公義。好多人聽到公義兩個字時會笑出口，不會相信有公義這回事。如果一位醫生可以醫死人之後沒人追究，沒有後果，當然就一定無公義啦！如果他的同行，即另一位醫生證明佢有違反責任，就算最終申索不成功，都成功證明佢有違反責任。到時係人都知佢冇醫德。當然，如果成功申索的話，原告人更可以得到賠償。

所以，尋求專業的法律意見好重要。等律師分析下有無可申索的醫療失誤事件，然後再睇下有無需要揾醫學專家撰寫專家報告。要防止醫療失誤事件的發生，就係等大家知道它已經發生。醫生要知道有後果，以後就會小心好多。

定立遺囑

遺囑 - 

香港人傳統上對定立遺囑都有點不安。有如英國人所講的 tempting the faith 。有時等到情況很緊急時，才揾律師去辦理。筆者最近於一月時，就到訪了一間醫院為一位客人辦理了一份遺囑。客人已差不多八十歲了。並患上了末期癌症。很不幸，立遺囑後十二天便主懷安息。如果辦理的時間晚一個星期，客人的精神狀態可能已經不能立遺囑了。或者，再晚一點，主懷安息後亦再不能立了。

正如人生中的其他事項，盡早安排不論對本人及後人，都有好處而又無壞處的。定立遺囑一般而言有兩種做法：立囑人可以在家中自行撰寫遺囑，在香港不論中文或英文遺囑都可於遺產承辦處直接做承辦。其他的語言所撰寫的遺囑辦理上就比較複雜了。另一種做法當然是揾律師啦！一般情況，定立遺囑其中一個重要目的就避免日後後人會內有争產的情況發生。所以在定立遺囑時，能有專業的法律意見，會比較理想。

筆者處理過一些争產的案件，就是先人一係無立遺囑，一係遺囑立得不理想。那麼，點先算係理想的遺囑呢？在立遺囑時，律師必須了解客人的財產的數目及種類，客人有什麼後人及其希望承受遺產的親人。重有一種往往不理想遺囑都會忽略的人：就是法律上認為立遺囑人應該有責任提供合理經濟濟助。例如，立遺囑人的同居女友，立遺囑人生前定期為其提供經濟濟助的。

如果，遺囑沒有為上述人士提供任何安排，她們可以在承辦完成後半年內向死者遺產提起訴訟。而一般情況下，所產生的律師費用可從遺產扣除。如果遺產不算很大，可能律師費都花去大半。這種遺囑當然不理想啦！所以在定立遺囑時，這方面的專業法律意見就很重要了。

筆者現時正在理處兩件這樣的案件。所以有切身的經驗。在定立遺囑時，筆者會同客人開一次會，通常需時一至兩小時，解釋上述的事項。當然這種做法，客人的費用會較高，但係就避免了日後可能會產生的大量律師費用。

遺囑的另一目的是合理安排身後遺產轉攘，盡量減少所需費用。這種安排當然同財產的數量及性質，後人的數目及同立遺囑人的關係有關。好難一概而論。呢個就係點解一般自行撰寫的遺囑有不理想的地方。表面上省了錢，日後可能問題多多。

由此可見，定立遺囑係好嚴肅的事情。大家應該認真對待，亦不能只在省錢的角度去看。